Útrýmum skömminni

Það er eitt atriði sem mig langar til að benda á í sambandi við þá áherslu sem lögð hefur verið á það, að þessi heyrnarlausu börn sem voru misnotuð af þeim sem þau áttu að treysta, hafi engum getað sagt frá vegna tjáskiptaerfiðleika.

það atriði er það, að tjáskiptaerfiðleikarnir eða heyrnarleysið hafi ekki skipt höfuðmáli í þessum sökum,

Því öll börn hvort sem þau eru heyrnarlaus eða ekki og sem misnotuð eru af þeim sem þau eiga að geta treyst t.d. sínum nánustu 'geta heldur ekki tjáð sig' um reynslu sína.

Alla vega hefur það verið reyndin fram á okkar daga.

Þetta er hinn sári sannleikur og er ég þó á engan hátt að gera lítið úr hinni ótrúlegri raun heyrnarlausu barnanna.

Börn sem verða fyrir kynferðislegri misnotkun af hendi sinna nánustu ættingja loka einfaldlega á svona hræðilega reynslu.

Þau gleyma henni á yfirborðinu sökum þess að annars gætu þau hreinlega ekki lifað af.

En þessi ógurlega lífsreynsla setur mark sitt á þau engu að síður sem getur komið fram í allskyns hegðunarröskunum og persónuleikaröskunum.

Þess vegna er svo óendanlega mikilvægt að allir þeir sem umgangast börn,  ekki bara kennarar eða aðrir opinberir starsmenn,  séu vakandi fyrir hvers konar neikvæðum breytingum á framkomu barnanna og frammistöðu þeirra, á hvaða vettvangi sem er.

Ég er ekki að mæla með neinni hysteríu en það er fyrir löngu kominn tími til, að útrýma þessarri skömm sem misnotkun á börnum er, en sem því miður hefur alltaf fylgt mannkyninu frá örófi alda, í skjóli bannhelginnar.

Samfylkingin hefur ekkert erindi í ríkisstjórn með Sjálfstæðisflokknum

Nú er óðum að styttast í kosningar aðeins rúmir 100 dagar 'to go' . Samfylkingin hefur látið í veðri vaka að hún hafi áhuga á ríkisstjórnar samstarfi með Sjálfstæðisflokknum.  En ég held að það myndi hafa skelfilegar afleiðingar fyrir Samfylkinguna að stíga það spor því með tímanum myndi hún lenda í fyrrum hlutverki Framsóknar í stjórnarsamstarfinu.

Hún yrði í minnihluta í ríkisstjórn og Sjálfstæðisflokkurinn myndi eins og í tíð Framsóknar einfaldlega verða áfram einráðir á valdastóli og valta yfir Samfylkinguna eins og Framsókn fyrrum.

Við ágætu landsmenn eigum það einfaldlega ekki skilið að fá aðra svipaða stjórnarsamsteypu og Sjálfstæðisflokkinn og Framsókn. Sjálfstæðisflokkurinn er búinn að vera allt of lengi við stjórnvölinn og tími til kominn að vinstrisinnaður flokkur fái tækifæri til þess að mynda ríkisstjórn. 

 Það væri miklu betri kostur fyrir Samfylkinguna að leita til einhverra þeirra minni flokkanna sem mest fylgi hafa á eftir henni til þess að mynda ríkisstjórn.

Mannhatarinn?

Það rann upp fyrir mér í dag þegar andskotans snjóbylurinn skall á

að ég er öllu fúsari til þess að gefa smáfuglunum brauð en mér

ókunnu fólki sem sveltur í útlöndum.

Mér finnst líka miklu huggulegra að knúsa kettina mína heldur

en útkámug ungabörn.

Þyrnirós eða hvað?

Hvernig í ósköpunum stendur á allri þessarri ofankomu og skítakulda? Virka þessi gróðurhúsaáhrif svona þrælöfugt eða hvað? Ef svo er verðum við öll beinfrosin áður en að því kemur að hitna fer í kolunum.

 

 

Kannski þetta verði bara eins og önnur útfærsla af ævintýrinu um Þyrnirós og við verðum öll í frystu formi í hundrað ár.

Eða allt þar til gróðurhúsaáhrifin koma eins og prinsinn á hvíta hestinum og bræða okkur með svo  heitum kossi að við vöknum til lífsins að nýju.

Það skyldi þó aldrei vera? 

Strandberg konungsættin í Bretlandi

Það er aldeilis nú eru tveir möguleikar á því að ég geti orðið drottinig eins og mig hefur alltaf dreymt um.

Í fyrsta lagi er bara að grafa það upp að einhvers staðar aftur í ættum tengist ég Edgari Æþeling sem Játvarður Englandskonungur tilnefndi sem eftirmann sinn árið 1066 og ef það gengur ekki upp er bara að kaupa minnsta ríki í heimi sem nú kvað vera til sölu. En þetta ríki er víst smá stálpallur staðsettur einhvers staðar undan ströndum Bretlandseyja.

 Annars er eitt í þessu getur bara ekki hvaða Íslendingur sem er og sem dettur það í hug, gert tilkall til bresku krúnunar? Erum við ekki öll komin út af alls konar kóngafígúrum sem flúðu hingað til Íslands á sínum tíma?

Ég þori að veðja að alla vega einn af þeim hefur verið náskyldur þessum Edgari.

 

EKKI OKKAR SÖK !

Svört er sól sviðin mannaból

seytlar blóð

í Fjandans feigðarslóð.

Drynur jörð er Dauðinn tyllir tá

í draugalegri borg við Tígrisá.

 

Grætur barn gáttir Heljar við

Guðs - krossfarar lutu ei Kristnum sið.

Lítill drengur líkn fékk ei

hjá þeim

sem limlestu og brenndu hans

skinn og bein.

 

Vér hjálpum þá.- Það er hið

 - minnsta mál.

Hendur kaupum - gerum við  hans sál.

Við sem erum Guðs útvalda þjóð

- og ekki okkar sök

 - þótt renni blóð.

 

Drynur jörð er Dauðinn tyllir tá

í draugalegri borg við Tígrisá. 

Íslenska ríkisstjórnin stendur sig ekki eins vel og hinar Norðurlandaþjóðirnar í málum öryrkja.

Ég las fréttina um það að öryrkjum fjölgaði stöðugt á Íslandi, þar stendur orðrétt '

'Geðraskanir og stoðkerfisraskanir eru algengustu orsakir örorku, að því er kemur fram í grein í nýjasta tölublaði Læknablaðsins. Þar kemur fram að áframhald hefur orðið á þeirri þróun síðustu ára, að öryrkjum fjölgi á Íslandi en mikil tækifæri séu til að draga úr þessari þróun með því að efla starfsendurhæfingu og grípa til annarra úrræða á vinnumarkaði, enda sé minna lagt í slík úrræði hér á landi en á hinum Norðurlöndunum

Ég hjó eftir því að þarna var skrifað  'en mikil tækifæri séu til að draga úr þessari þróun með því að efla starfsendurhæfingu og grípa til annarra úrræða á vinnumarkaði'.

Þetta vita allir sem einhverja glætu hafa í kollinum, nema ríkisstjórnin auðvitað. Alla vegana fá stofnanir eins og skólar fyrir fatlað fólk ekki nema helminginn af því fé sem þarf til þess að reka þá.

Hvers vegna í ósköpunum er ríkisstjórnin svona blind, eða nísk á fé til þess að hjálpa öryrkjum að öðlast nýtt og betra líf?

Varla er það af tómri mannvonsku eða hvað? Eða eru það tómir fordómar sem ráða för?

Kannski það sé bara hrein og bein níska því ríkisstjórnin vilji nota peningana í eitthvað annað þarfara að hennar mati,  eins og til dæmis dýr veisluhöld, risnu eða annan munað fyrir toppmenn þjóðfélagsins.

En með því pissa þeir svo sannarlega í skóinn sinn því það kostar þjóðfélagið svo miklu meiri fjármuni að greiða fyrir uppihald öryrkja á sjúkrastofnunum en að láta einhverja smámuni af hendi rakna til endurhæfingar fyrir þá.

 Það er öllum mönnum nauðsynlegt að hafa einhverja sjálfsvirðingu. Öryrkjar hafa frekar lítið af henni og ekki batnar sjálfsvirðing þeirra við það að þeir séu taldir svo lélegur pappír að skólar fyrir þá teljist vera nánast óþarfir að mati ráðamanna.

Hvað sem því líður þá er það óhrekjanleg staðreynd að hin íslenska ríkisstjórn stendur sig ekki eins vel í endurhæfingu öryrkja og ríkisstjórnir hinna Norðurlandanna.

En eins og flestöllum er ljóst er það líklega vegna þess að hún er svo upptekin við það að hlaða undir þá sem meira mega sín í þjóðfélaginu.

Hefði verið betra fyrir konuna sem fannst látin í íbúð sinni ef hún hefði verið Inúíti til forna?

Þegar ég las fréttina um gömlu konuna sem fannst látin í íbúð sinni varð mér hugsað til aldraðrar konu sem lá á sömu sjúkrastofu og ég þegar ég var ung stúlka.

Þessi kona var með krabbamein í nýrunum og fyrstu mánuðina sem ég lá á þessari stofu með henni var hún nokkuð hress. Gat sest upp í  rúminu og talað við okkur hinar sem lágum þarna með henni, sem og þá sem komu í heimsókn til hennar.

Em smátt og smátt fór að draga af henni og hún kvaldist mikið. Oft var það svo að við hinar konurnar gátum ekki sofið vegna hljóðanna í henni.  Æpti hún þá oft frávita af kvölum. 'Ég vil ekki deyja, ég vil ekki deyja'

þegar við  kvörtuðum (með vondri samvisku) undan því að það væri ekki nokkur leið að sofa vegna hávaðans í henni var henni rúllað í rúminu sínu út af stofunni og inn í annað herbergi.

Á endanum var hún orðin svo langt leidd að hún var meðvitundarlaus og þá var henni líka rúllað út af stofunni í rúminu sínu,  til þess að deyja. 

Ég átti erindi fram á gang skömmu seinna og átti þá leið fram hjá litlu kompunni þar sem hún lá ein og yfirgefin og beið  dauða síns Það var opið inn til hennar svo allir sem gengu þarna hjá gátu horft upp á dauðastríð hennar. Þetta var nú öll virðingin og tillitsemin sem henni var sýnd.

 Ég man að ég hugsaði þá með sjálfri mér að ég ætlaði ekki að deyja á sjúkrahúsi þegar þar að kæmi.

 Lærdómurinn sem mér finnst ég geta dregið af þessu er sá að það er öllum sama um þá sem eru gamlir og veikburða hvort sem þeir eru á sjúkrahúsi eða einir heima hjá sér.

 Það er eins og fólk hrökkvi aðeins við þegar svona fréttir berast eins og þessi, að gömul kona hafi fundist látin heima hjá sér og allir tala um það í nokkra daga að við þurfum að sýna meiri náungakærleika.  

Sumum bregður þó meira  en öðrum það er að segja þeim sem eiga aldraða móður eða föður sem búa ein og sem þau heimsækja sjaldan.

En svo gleymist þetta fjótlega í þessu hraðskreiða þjóðfélagi þar sem enginn má vera að því að sinna þeim öldruðu sem búa einir.

 Satt að segja held ég að eins og komið er fyrir öldruðum í þessu blessaða velferðar og útrásar samfélagi væri það miklu hreinlegra og betra fyrir gamla fólkið að við stigjum skrefið til fulls og  hefðum það einfaldlega eins og Inúítar hér áður fyrr sem skildu gamla fólkið eftir úti á ísnum þegar það var orðið öðrum til trafala.

  

Í sjöunda himni

Smá engill með eplakinnar
þyrlar upp snjóskýjunum
í sjöunda himni
ærslast við lítinn hvolp
og hundslappadrífan
fellur til jarðar.

Börnin gera engla í snjóinn.

Álfar, tröll (og sumarbúðir fyrir jólasveina.)

Mikið fannst mér yndislegt að líta út um gluggann í morgun og sjá logndrífuna og alhvíta jörð.

það lá við að ég kæmist aftur í síðbúið jólaskap. Mér fannst þetta kjörið þrettándaveður ekki seinna að vænna að jólasnjórinn kæmi síðasta dag jóla á þrettándanum.

Ég settist svo við tölvuna og las fréttina um álfana og tröllin sem er nú boðið hæli á Stokkseyri þar sem eins og segir þrengir nú verulega að þeim í íslenskri náttúru vegna stóriðjuframkvæmdanna.

Mér finnst þetta verulega fallega gert að bjóða þessu vættum sem hafa búið með okkur í landinu frá upphafi húsaskjól. En jafnframt fannst mér það svolítið sorglegt að nú væri svo komið að Ísland væri orðið svo náttúrulaust vegna stóriðjunnar að ekki einu tröll eða huldufólk gæti lengur sinnt sinni náttúru í sína rétta umhverfi.

Heldur þyrfti að framleiða einskonar náttúrulíki og hafa til sýnis innandyra og bjóða þessum yfir- náttúrulegu löndum okkar að hafast þar við.

 Það var einnig tekið fram í fréttinni að álfar og huldufólk flyttust búferlum á nýársnótt. En mér vitandi gera þeir það einnig á þrettándanum. Svo það hlýtur að verða mikið fjör hjá þessum vinum okkar í nótt.

Kannski koma þeir við á einhverri þrettándabrennunni á leið sinni til nýrra húsakynna og taka þar þátt í söng og dansi og kveða með okkur ' Glottir tungl og hrín við hrönn og hratt flýr stund.'

 En nú finnst mér bara vanta að einhver góðhjartaður aðili taki sig til og stofni sumarbúðir fyrir jólasveina.

Mér finnst ekki veita af því að þeir fái einhvers staðar aðstöðu til þess að slappa af fyrir jólavertíðina þar sem hún er alltaf að lengjast. Því nú byrjar vinnutími jólasveina í október og þriggja mánaða jólatörn er anskoti mikið,  jafnvel fyrir jólasveina.