Tító er æði svona, ekki satt? Og listmálari á listráðstefnu

Þegar ég var að skoða myndirnar mínar sem ég teikna blindandi, mundi ég allt í einu eftir skemmtilegri sögu um landsþekktan listmálara, sem er fyrrum kennari í Myndlista og handíðaskóla Íslands.

Þessi tiltekni listmálari missti heyrnina þegar hann var ungur drengur, svo hann getur talað nokkuð eðlilega og les hann auðveldlega af vörum manna.

Eitt sinn var heyrnarlausi listmálarinn beðinn um að vera fulltrúi íslenskra listamanna á mikilli og fínni listráðstefnu erlendis, þar sem listamenn frá ólíkum löndum komu saman og gekk það auðvitað vel og fór ráðstefnan fram með miklum sóma.  

Ráðstefnunni lauk svo með kvöldverði þar sem listaspekúlantarnir gæddu sér á dýrindis réttum og eðalvínum.

Íslenski listmálarinn, heyrnarlausi, skemmti sér hið besta við matarborðið og lét ljós sitt skína ótæpilega í umræðum manna á milli um hinar fögru listir og talaði hátt og mikið með sinni drynjandi röddu . Fannst einum boðsgestanna sem var fulltrúi frá einu Norðurlandana nóg um vaðalinn í hinum heyrnarlausa  listamanni og hugðist lækka í honum rostann. 

Vék hann sér að því að hávaðaseggnum og spurði meinfýlslega. 'Hvernig í ósköpunum stendur á því að  Íslendingar sendu heyrnarlausan mann á listráðstefnu'?

En hinn íslenski gleðimaður lét ekki stinga uppí sig frekar en venjulega. 'Það er af því þeir höfðu engan blindan',  svaraði hann stuttur í spuna.

Athugasemdir

[Ása Hildur Guðjónsdóttir, 6.11.2007 kl. 09:29]

[halkatla, 6.11.2007 kl. 11:09]

snilldar mynd og saga

[Kristín Katla Árnadóttir, 6.11.2007 kl. 11:13]

Falleg mynd og skemmtileg saga.

[Guðrún Sæmundsdóttir, 6.11.2007 kl. 15:50]

góð saga! Ég skil ekki alveg hvernig þú ferð að því að teikna blindandi, ég rétt svo næ að teikna skammlaust Óla Prik með fullri sjón Hæfileikarnir mínir liggja klárlega ekki í myndment þessvegna hef ég gaman að því að sjá hvað þú og aðrir listamenn hérna á blogginu eruð flink

[Svava frá Strandbergi , 6.11.2007 kl. 19:31]

Þetta eru þrotlausar æfingar við að teikna svona blindandi, Guðrún.

[Marta B Helgadóttir, 6.11.2007 kl. 23:10]

skemmtileg saga