Árs afmæli reykbindisis

Í gær var ég búin að vera hætt að reykja í heilt ár. Ég trúi þessu varla. Rosalega er ég dugleg maður! Fyrstu mánuðina eftir að ég hætti blés ég út, enda alltaf nartandi í sælgæti, en nú er ég  farin að skreppa saman aftur, þar sem  ég er líka komin yfir sætindalöngunina sem hrjáði mig fyrstu mánuðina.

Ég finn ekki fyrir mæði lengur þó ég labbi uppá þriðju hæð og það er mikill munur að geta líka gengið brekkur án þess að finna fyrir verkjum í kálfunum vegna súrefnisskorts.

Já það er nú það, þetta er ekkert mál, það er nú heila málið. Bara að drepa í fjárans rettunni og taka svo eina klukkustund í einu og áður en þú veist af er liðið heilt ár. Þegar þeim áfanga er náð er eftirleikurinn auðveldur. Ekki fer maður að byrja aftur að reykja eftir að hafa verið svona úthaldsgóður í tólf mánuði. Nei ó nei, ekki hún ég.

Ég hélt uppá afmælið með því að fara með vinkonu minni í bíó. Við sáum myndina 'No reservations.' Ágætis rómantísk gamanmynd, með Catherine Zeta Jones og einhverjum karlleikara sem ég man ekkert hvað heitir. Við skemmtum okkur ágætlega. Svo þegar ég kom heim hélt ég líka uppá daginn með því að leyfa Tító og Gosa að sofa hjá mér þrátt fyrir ofnæmið sem hrjáir mig öðru hvoru. Þeir voru alsælir og ég líka.

Athugasemdir

[Kristín Katla Árnadóttir, 11.10.2007 kl. 10:26]

Til hamingju með  að vera hætt að reykja dugleg ertu og ég óska þér til hamingju með afmælið.

[Svava frá Strandbergi , 11.10.2007 kl. 10:28]

Takk Kristín mín.

[Fanney Björg Karlsdóttir, 11.10.2007 kl. 11:01]

"Datt" hingað inn fyrir tilviljun..... en til hamingju með reykingabindindið.....

er sjálf búin að vera reyklaus í tæpt ár.... og þetta með árans kílóin sem safnast þar sem þau eiga ekki að safnast..... o m g

[Gúrúinn, 11.10.2007 kl. 12:36]

Til hamingju! Það er gott að vera laus við tóbakið. Er sjálfur búinn að vera í bindindi í 23 ár núna. Málið er að hætta ekki að vera hætt(ur) ef maður skyldi álpast til að fá sér smók. Hugarfarið er nefnilega það sem skiptir mestu máli.