Einvígið við ófreskjuna og fleira

 

Ég var að dunda mér í dag við hitt og þetta, en þó aðallega þetta. Ég var að gera þessa mynd sem ég kalla 'Einvígið við ófreskjuna'.
Ég  er  búin að  tala við gallery á Skólavörðustíg. Reyndar sendi ég myndir þangað líka í tölvupósti. Gallerys eigandinn var mjög hrifin af myndinni Stúlkan í græna kjólnum, myndina Sólheimajökull og Manndómsbrekkan, já og svo nefndi hún líka að Ísilagt vatnið væri fín.
Ég get víst fengið sýningarpláss hjá henni í febrúar á næsta ári. En ég er samt ekki viss hvort ég verði komin með nægar myndir til  að sýna, né næga peninga, því vikan hjá henni kostar 72 þúsund krónur, en það er reyndar með öllu. Það er að segja yfirsetu, boðskortum og hún sér einnig um að hóa í fjölmiðla og svoleiðis stöff.
Svo er galleryið með alþjóðlega  heimasíðu sem er mikið heimsótt af kaupendum erlendis. Þarna er líka boðið uppá vaxtalaus lán til þess að fjárfesta í myndlist.

Jæja ég sé bara til, en vona  samt að  ég  geti  haldið  þessa sýningu hjá  henni eftir 4 mánuði.

Nú ef ekkert verður af þessu hef ég þó alltaf fyrirhugaða bloggvinkvennasýningu í Ráðhúsinu upp á að hlaupa, en hún verður opnuð 29. ágúst á næsta ári.

Ég er búin að segja upp í leikskólanum. Það var alltof mikið álag á bakið á mér að bogra yfir 7 börnum í einu, til að kenna þeim myndlist við svona pínulítil borð og stóla sem þau sátu á.
Ég er með kölkun í baki og mænuþrengsli og einnig í hálsi. Taugaverkir leiða niður í vinstri fót og vinstri handlegg. Ég hef alltaf verið svo vinstri sinnuð, þess vegna er ég með náttúrulega með vinstri verki. Þessi seinni helmingur af síðustu setningu, eða partur úr henni, er stolinn frá Sigga bróður, úr bókinni 'Í leit að sjálfum sér'

Ég sótti um vinnu í dag á netinu sem aðstoðarmaður iðjuþjálfa á geðsviði Landsspítalans. Æ, ég vona að ég fái þá vinnu, eða þa´vinnu sem skólaritari sem ég ætla að sækja um á mánudag.

Annars fékk ég smá aukavinnu í gær við að skrautskrifa á skjöl fyrir Halaleikhópinn. Það var þrælgaman að gera þetta. Mér þótti verst að þurfa að taka pening fyrir, því það var ein bloggvinkona mín sem bað mig um þetta. En ég er alltaf blönk svo ég tók við borgun fyrir verkið. 

Svo slappaði ég af yfir sjónvarpinu í kvöld eftir sameiginlega máltíð okkar Títós og Gosa. Ég eldaði kjúkling og þeir vomuðu yfir mér frammi í eldhúsi, meðan ég var að elda. Mér fannst verst að geta ekki lagt á borð fyrir þá svo við hefðum getað haft það huggulegt við borðstofuborðið og snætt kjúklinginn saman í bróðerni.

En því miður tóku þeir ekki í mál að gera mér þann heiður, svo ég borðaði bara ein,  fyrir framan sjónvarpið en þeir af skálinni sinni frammi í eldhúsi. En mikið lifandis skelfing sleiktu þeir mikið út um eftir að hafa hámað í sig kjúklinginn. Ég gerði það reyndar líka, svona fyrst að enginn sá til mín.

Á morgun ætla ég á kaffihús með vinkonu minni í Kringlunni. Skoða smá föt í leiðinni og svona.

Well best að fara að sofa  

Athugasemdir

[Steinunn Helga Sigurðardóttir, 30.9.2007 kl. 06:54]

gangi þér vel með þetta allt saman. stundum er gott að taka sjénsa.

sæt með þig og kisurnar þínar.

AlheimsLjós til þín

Steina

[www.zordis.com, 30.9.2007 kl. 08:56]

Mér líst vel á þessa sýningu hjá þér í febrúar!!!!  Vonandi verður af henni hjá þér .....  Farðu vel með þig kæra vinkona því heilsan er mikilvægust af öllu.

Ég hlakka til að hitta þig næsta sumar!

[Svava frá Strandbergi , 30.9.2007 kl. 12:22]

Ljós til þín líka Steina mín.

Já, það verður spennandi að hitta þig Zordís og ykkur allar á næsta ári.

[Þorkell Sigurjónsson, 30.9.2007 kl. 13:01]

Sæl Svava. Eitthvað innra með mér  sem hvatti mig til að láta vita af mér.   Veit ekki hvers vegna, en nú hefi ég komið því frá mér. Kveðja.

[Jóna Á. Gísladóttir, 30.9.2007 kl. 14:40]

sæl Guðný mín. Það er margt að gerast hjá þér og sem betur fer fullt af spennandi og skemmtilegum hlutum. að taka séns ef það er möguleiki getur verið afar gæfuríkt. Good luck

[Ása Hildur Guðjónsdóttir, 30.9.2007 kl. 14:50]

Ég er viss um að þér tekst að halda sýninguna enda áttu fullt af gullfallegum myndum. Gangi þér vel í atvinnuleitinni.

Skrautskriftin á skjölun var frábær og allir himinlifandi með þessi listaverk.

[halkatla, 30.9.2007 kl. 18:05]

mér finnst þetta biluð mynd {flott}

gangi þérog kisunum allt í haginn

[Svava frá Strandbergi , 30.9.2007 kl. 20:39]

Keli minn, þetta eitthvað innra með þér eru fjarhrif, því ég þurfti svo sannarlega á því að halda í dag að einhver léti í sér heyra. Þakka þér fyrir að láta vita af þér, mér þykir vænt um það

Takk Jóna, good luck to you too.

Ása Hildur, takk og það var gott að allir voru hrifnir af skjölunum.

Takk Arna og Anna Karen. Kveðja til Kassöndru litlu.