Það eru alltof oft hinar undarlegustu málfarsvillur í fréttaskýringum á mbl.is

Í frétt einni á mbl.is, sem ber yfirskriftina, 'Pénelope hrifin af Lundúnum', er greint frá því, að spænska leikkonan Penélope Cruz, hafi fallið 'kolflöt' fyrir borginni.
Mér er spurn, varð Penélope, af einhverjum ástæðum fyrir því óláni að detta um kolabing og hvernig í ósköpunum stóð á því að kolabingurinn varð á vegi hinnar frægu stjörnu?  Eða kollsteyptist hún kannski ofan í einhvern kolakjallarann og hver var þá svo óábyrgur, með leyfi, að hafa kolageymsluna sína opna upp á gátt, svo hver sem væri gæti pompað on´í hana?
Mér finnst að Lundúnabúar eigi skilyrðislaust að passa betur uppá kolin sín, svo að alsaklaust utanbæjarfólk þurfi ekki að óttast að falla svona um þau, eða fyrir þau.
Annars stóð ég reyndar í þeirri meiningu að það væri fyrir löngu hætt að kynda með kolum í Lundúnaborg, en það er líkast til minn misskilningur eins og svo margt annað.
Ég hefði kannski skilið þessa frétt betur, ef sagt hefði verið frá því, að Penélope hefði fallið kylliflöt fyrir borginni.

Er kannski 'sjens' á að fá vinnu sem prófarkalesari hjá mbl.is?

ps.
Fréttaritarinn er heldur ekki með það á hreinu hvort leikkonan fagra, heiti Pénelope, eða Penélope. 

Pénelope hrifin af Lundúnum

Athugasemdir

[Kristín Katla Árnadóttir, 2.9.2007 kl. 19:44]

Mér skilst að hún sé að leita sér að húsi konu stráið.

[www.zordis.com, 2.9.2007 kl. 19:57]

Kanski að maður feti í fótspor hennar og steypi sér í næsta kolakjallara.  Hef aldrei komið í borgina og væri alveg til í að fara og skoða það sem í boði er!

[Ásdís Sigurðardóttir, 2.9.2007 kl. 21:26]

Hún finnur kannski fallegt hús með kolakjallara.  Annars er ekki eðlilegt hversu illa talandi og skrifandi þessir fréttamenn eru nú til dags.