'Eins og brenndur snúður heim'?

Ég sit hérna við tölvuna við hliðina á galopnum vesturglugganum og glápi á sólarlagið með öðru auganu meðan ég blogga. Kettirnir mínir, Tító og Gosi hanga hálfir út um gluggann og glápa líka, ekki þó á sólarlagið, þeir eru ekki svo rómantískir kattarforsmánirnar, nei þeir hafa meiri áhuga á biðurkollufræjunum sem fjúka framhjá glugganum.
Tító hefur þó varan á sér, minnugur máva árásarinnar fyrir nokkrum dögum,  því það situr vígalegur mávur á næsta ljósastaur. Þessi mávur dirfðist líka að hringsóla gargandi yfir mér úti í garði áðan,  en settist  svo á ljósastaurinn rétt hjá mér.
Ég var eiginlega hálfhrædd við hann og datt í hug í alvöru hvort hann myndi kannski leggja í  það að ráðast á mig?  Hann hafði nú ekki hugrekki til þess, enda eins gott fyrir hann því þó ég væri hrædd við hann, ætlaði ég að verjast í lengstu lög og hefna harma Títós líka.

Já, ég er nýkomin utan úr garði, var að vökva blómaræksnin eftir þennan sólríka dag. Mér finnst ansi heitt úti en þó er heitara en í Helvíti,  þar sem leið mín liggur eftir fáeina daga. Ég sá það á netinu í morgun að þarna við Miðjarðarhafið á Krít, nálægt Chania, sem er áfangastaðurinn er 42 stiga hiti! 

Það er nebbnilega það! Ég hef einu sinni verið í 43 stiga hita í Californiu fyrir þrjátíu árum, þegar ég var ung og fær í flestan sjó, en ég lagðist samt í rúmið  þá, ásamt tveggja ára syni mínum sem steyptist allur út í eldrauðum hitabólum.  Vegna þessarrar slæmu reynslu minnar aftur í grárri forneskju fékk ég náttúrulega hálfgert móðursýkiskast yfir því að ætla nú að ferðast í annan álíka suðupott á Krít og það þrjátíu árum eldri og hrumari, en þegar ég ung og hraust eins og fyrr segir, lenti í hitabylgjunni í USA .
Ég myndi örugglega ekki sleppa svona billega í þetta sinn, að þurfa bara að leggjast í rúmið. Nei ég var sjúr á því ég myndi þurfa að liggja í kistu, eftir örstutta dvöl á hinni sólríku Krít, sem sótsvart kolbrunnið lík, tilbúin til þess að láta skutla mér heim oní svala og kælandi moldina heima á Fróni.

Í þessum svartýnis hugleiðingum hringdi ég í bróður minn og sagði honum mínar farir ekki sléttar, en hann hló bara góðlátlega að mér. Sagði að hann hefði það eftir sínum öruggu heimildum að veðrið yrði komið niður í þægileg 32 stig þegar ég væri komin á áfangastað. 

Svo ég er öllu rórri þó ég sé flughrædd líka og því verður stefnan tekin á Krít á fljúgandi 'fullri' ferð. 

 

   

  

Athugasemdir

[Jens Sigurjónsson, 26.6.2007 kl. 01:26]

það er ansi heitt við miðjarðarhafið þessa dagana, vonandi verður svalara þegar þú kemur í hlaðvarpan á Krít.

[Agný, 26.6.2007 kl. 02:10]

OHHH ég sem elska sól og hita og þoli bæði vildi sko gjarnan skifta við þig og fara þarna....... En það yrði sko að vera frítt því ég finn ekki peningatréð ennþá. Kanski ég sé of neikvæð...en var búin að senda alveg og hugsa allt jákvætt í sambandi við afmælið mitt..sem er alveg á næstu grösum... meira að segja búin að búa til rétta slagorðið....  Jæja..slagorðið mega þá aðrir fá seinna..... En skemmtu þér vel og hugsaðu til mín þegar þú ert að stikna

[Agný, 26.6.2007 kl. 02:12]

Ég ætlaði nefnilega að vera í útlöndum núna og í tvær vikur..... en hér sit ég og get ekki betur....

[Svava frá Strandbergi , 26.6.2007 kl. 02:49]

Takk Jens og til hamingju með væntanlegt afmæli Agný.

[Ester Sveinbjarnardóttir, 26.6.2007 kl. 08:18]

Þetta verður frábært frí, og þú verður bara enn sælli og glaðari yfir því vegna þess að þú sleppur við þennan mikla hita. 

[Svava frá Strandbergi , 26.6.2007 kl. 09:38]

Ég fer á laugardaginn Arna. Afsakið öll hvað ég hef verið léleg að kommment a hjá ykkur undanfarið, ég hef bara verið svo busy.

[Kristín Katla Árnadóttir, 26.6.2007 kl. 09:40]

Ég lendi í svona hitabylgju líka í USA þetta var hræðilegt ég man að kastaði upp en vonandi verður ekki svona heitt þegar þú verð þangað skemmtu þér vel.

[Svava frá Strandbergi , 26.6.2007 kl. 09:43]

Takk Kristín mín.

[Svava frá Strandbergi , 26.6.2007 kl. 14:54]

Jú, það væri upplagt Guðmundur að kaupa mávastellið handa Tító, en ætli það fáist ennþá?

[Heiða B. Heiðars, 26.6.2007 kl. 14:58]

Iss við förum létt með þetta! Þessi hiti vogar sér ekki að þvælast fyrir okkur

[Svava frá Strandbergi , 26.6.2007 kl. 15:21]

Já Heiða við þurfum bara að útvega okkur viftur sem eru þannig útbúnar að þær eru festar með stöng við gjörð sem við spennum efst utan um hausinn á okkur  Svona hausvifta myndi náttúrulega kæla okkur alveg niður úr öllu valdi.  

[Heiða B. Heiðars, 26.6.2007 kl. 15:30]

Ég er með enn betri hugmynd! Ætla að finna mér sætan mann... grískan guð, til að elta mig um allt veifandi fjöðrum

[Svava frá Strandbergi , 26.6.2007 kl. 16:08]

Já það er satt, ég var alveg búin að gleyma því!  Ég ætlaði líka að finna mér sætan mann, grískan að sjálfsögðu. Veit ekki hvort ég hef sjens í einhvern guðinn, en sendiboði guðanna Hermes gæti orðið góður kostur. Hann myndi kannski taka mig með í smáútsýnisflug og kæla mig niður í leiðinni uppi í háloftunum. Þá myndi ég aldeilis verða hátt uppi og líta niður á ykkur hin, haha!.

[Sigurður Þór Guðjónsson, 26.6.2007 kl. 16:43]

Ég

[Svava frá Strandbergi , 26.6.2007 kl. 16:46]

Ég hvað?

[Sigurður Þór Guðjónsson, 26.6.2007 kl. 16:47]

Ég var að skoða nýjustu spá og nú er gjört ráð fyrir 60 stiga hita á Krít einmitt þegar þú verður þar. Jarðvísindamenn eiga líka von á ógnarskjálfta upp á 8,9 á Richter á næstunni og svo er víst yfirvofandi gos á Santorini en þar varð einmitt eldgosið mikla sem lagði elstu Krítarmenninguna í rústir. Það er alltaf gaman að taka þátt í sögulegum stórtíðindum hvort sem maður er nú dauður eða lifandi eða jafnvel lifandi dauður. 

[Svava frá Strandbergi , 26.6.2007 kl. 17:12]

Okey! þá hraðsteikjumst við bara í góða veðrinu, eða þá að jörðin gleypir okkur lifandi í jarðskjálftanum. En mér finnst þriðji og síðasti kosturinn skástur að við gröfumst í fyrirvaralausu, baneitruðu öskugosi frá Santorini. Svona svipað og gerðist í, (æ ég man ekki hvað  í andsk.. það heitir í augnablikinu) Við verðum svo grafin upp sem steingerðar múmíur okkar eftir nokkur þúsund ár. Þá verður maður allavega heimsfrægur þó seint sé. Við verðum þá líklegast öll með göt á rassgatinu, eins og múmían margrómaða í British Museum.    

[www.zordis.com, 26.6.2007 kl. 18:37]

Hva, er bloggvinaferd til Krít ?  Zad verdur alldeilils fjör hjá  ykkur.  Bid ad heilsa Krítarkonunni.

[Ásdís Sigurðardóttir, 26.6.2007 kl. 20:10]

Góða skemmtun Guðný mín, þetta verður örugglega frábært og ég skil þetta með hitann, of mikið er ekki fyrir mig heldur. Hvar verða kisurnar? Besu kveðjur þín verður saknað, kannski geturður bloggað á Krít.

[Svava frá Strandbergi , 26.6.2007 kl. 21:52]

Já zordís, við erum þrjú frækin að fara til Krítar. Skila kveðjunni frá þér.

Ásdís, takk,  sonur minn ætlar að koma tvisvar á dag til þess að hugsa um kisurnar, svo þarf ég að kenna honum hvernig hann á að vökva alla blómaflóruna á sólsvölunum, ef hann þá nennir því. Nei ég get ekki bloggað á Krít held ég, er ekki með fartölvu.

[gerður rósa gunnarsdóttir, 26.6.2007 kl. 23:47]

LOL