Það er komið sumar!

Við dóttir mín fórum í bæinn í dag. Veðrið var svo gott að við gátum setið úti í sólinni fyrir utan Cafe París. Það er svo sannarlega komið sumar í dag,  enda sumardagurinn fyrsti. Vð tókum eftir því að trén á Austurvelli eru komin með pínulítil ljósgræn blöð.
Ég vissi það enda mætti ég vorinu hérna um daginn á förnum vegi með sína ljósgrænu húfu.
Við fengum okkur súkkulaði og vöfflur með rjóma og stúderuðum mannlífið enda svo margt um manninn á Cafe París að við þurftum að bíða næstum klukkutíma eftir reikningnum.
Við horfðum líka á Vally á Lækjartorgi þar sem hann lék listir sínar með kúnstugum tilþrifum við fögnuð viðstaddra og í Austurstræti sat gamall maður og spilaði á gítar og söng Bítlalög angurværri röddu. Það var semsagt bullandi líf í bænum  í dag, fyrir utan dánu húsin sem brunnu í gær, en vonandi verða þau endurbyggð en ekki byggðir einhverjir forljótir glerkassar á þessu stórmerkilega götuhorni. Einmitt þarna á horninu gerðust mörg æfnitýri hér áður fyrr þegar rúnturinn var og hét í þá gömlu góðu daga.
Þegar ég kom heim labbaði ég aðeins út í garð og þar er sumarið aldeilis komið á fullt. Laukarnir sem ég hafði svo mikið fyrir að gróðursetja í fyrrahaust eru farnir að gægjast uppúr moldinni hver af öðrum. Svo ég hlakka til að sjá þegar  túlípanar, hvítasunnuliljur, páskaliljur og krókusar fara að blómsta.  Þá get ég sagt um garðinn minn, ´ þar gala gaukar og spretta laukar'

Gleðilegt sumar öll sömul og takk fyrir veturinn. 

Athugasemdir

[Kristín Katla Árnadóttir, 19.4.2007 kl. 23:45]

 það er satt að það var að sólin skein í heiði í dag sammt svolítið kalt

[Kristín Katla Árnadóttir, 20.4.2007 kl. 00:20]

Ég sendi þetta vitlus út til þín það sem ég var að segja  að mér fann svolítið kalt í  í dag og fyrgefuð mér villurnar sem ég geri oft það er svo langt síða að ég hef skrifað en þú er yndslega góð kona   þú segir svo fallega frá enda ertu listakona og myndirnar eru fallegar þú ert mjög hlý kona. Þakka þér fyrir að vera blogg vinur minn.

[Svava frá Strandbergi , 20.4.2007 kl. 00:24]

Þakka þér sömuleiðis Kristín mín. Þú ert svo sannarlega góð bloggvinkona og ég get lesið hlýjuna frá þér í gegnum bloggin þín.

[Katrín Snæhólm Baldursdóttir, 20.4.2007 kl. 16:22]

Vonandi bara vex hlýjan meir og meir..hér og þar og alls staðar. Bæi inni og

úti!!!

[Svava frá Strandbergi , 20.4.2007 kl. 16:44]

Já, 'Nú verður aftur hlýtt og bjart um bæinn' og það verður sól úti og sól inni og  sól í sinni.

[www.zordis.com, 20.4.2007 kl. 19:20]

Var ekki yndislegt ad njóta lífsins á gódum degi í frábaerum félagsskap!  Gledin er vissulega ein af forréttindum tilfinninga!  G-óda helgi