Gleðidagur

Ég fór með systur minni og vinkonu að horfa á Gay- Pride gönguna. Við plöntuðum okkur niður í Bankastræti og fylgdumst með þessari meiriháttar gleðigöngu. Þarna var mikið af fjölskyldufólki og alls konar fólki, fólki með sínum heittelskaða eða heittelskuðu og það var líka gaman að sjá að aldrei þessu vant var mikið af fólki með hunda af öllum  tegundum i miðbænum. Það var ekki síður gaman að skoða alla þessa fallegu hunda, heldur en mannfólkið og mér finnst það synd að oftast er bannað að vera með hunda í miðbænum.
Við systurnar hittum bróður okkar í Lækjargötu og hann var líka upprifinn og í góðu skapi eins og allir aðrir. Ekki spillti veðrið heldur fyrir, sól og sautján stiga hiti.

Það er frábært að Íslendingar séu svona jákvæðir í garð homma og lesbía, því víða í heiminum er fólk drepið fyrir að sinna kalli hjartans í sínum ástamálum.

Samkynhneigð hefur alltaf verið til og mun alltaf vera til. Samkynhneigð er heldur ekki bundin við mannkynið eitt, því mörg dæmi eru til um samkynhneigð dýr, bæði úti í náttúrunni og hjá tömdum dýrum.  Svo nærtækt dæmi sé tekið þá eru til  dæmis  margar samkynhneigðar endur á Tjörninni í Reykjavík. Ég bý líka sjálf með tveimur hommum, það eru kettirnir mínir tveir, sem eru báðir fress. Þeir elska hvor annan fölskvalaust, sofa stundum með vangana saman og þvo hvor öðrum hátt og lágt. Já og mynda sig til þess að makast hvor með öðrum og ef annar þeirra er eitthvað vansæll þá rýkur hinn til og huggar hann. Svo geta þeir slegist á milli, en allt í góðu samt.

Við skulum muna það að bæði menn og dýr eru ólík innbyrðis. Enginn er eins, sumir eru gagnkynhneigðir, aðrir tvíkynhneigðir og  enn aðrir samkynhneigðir. Við rúmumst öll undir litum regnbogans og þar er nóg pláss fyrir alla okkar ást og fyrir mismunandi kynhneigðir okkar. 

En því miður er enn til fólk sem lifir í fordómum gagnvart öðrum að þessu leyti og sorglegt að margt af þessu fólki telur sig trúa öðrum heitar, á Guð og Jesú sem boðaði ást og umburðarlyndi milli allra  manna. 

Ég veit þess dæmi að fólk sem hefur verið mjög trúhneigt í lífi sínu og sem hefur komið út úr skápnum seint á ævi sinni hefur verið útskúfað af meðbræðrum sínum og systrum í trúnni. Slíkt hefur jafnvel leitt til hinna hörmulegustu atburða svo sem sjálfsvíga þessa fólks sem fær ekki frið til þess að hlýða kalli hjarta síns.

Mér finnst það hroki og beinlínis rangt af þeim strangtrúuðu að dæma meðbræður sína fyrir þær kenndir sem þeim eru áskapaðar og halda samt stíft fram eigin ágæti og hreykja sér hærra en nokkrum manni er leyfilegt. Þetta fólk heldur því fram að þeir sem ekki trúa á Guð á sama forpokaða mátann og það sjálft, fari beint til Helvítis, en það sjálft aftur á móti beint til himna.  Höfum í huga það sem Jesús sagði, 'Dæmið ekki svo þér verðið ekki sjálfur dæmdur' 

Athugasemdir

[Ása Hildur Guðjónsdóttir, 12.8.2007 kl. 01:42]

Gott að heyra að þú áttir góðan dag. Verst að ég skildi ekki rekast á þig, en þegar 50.000 manns eru á litlum bletti missir maður af sumu. Dásamleg ganga og stemming. Arnarhóllinn minnti mig á 17 júní í denn. Ég elska GayPride

[Svava frá Strandbergi , 12.8.2007 kl. 01:49]

 Já það var rosa stemning í dag og minnti mig líka á 17. júní.

[www.zordis.com, 12.8.2007 kl. 05:29]

Ég hefði verið til í að vera þarna og taka þátt í gleðinni.  Reyndar var víða gleði á Íslandi ..... Fiskidagurinn á Dalvík og Hafnardagar í Þorlákshöfn!

Það er með ólíkindum hvað sumir fara út fyrir svið þess að meta persónuna og hennar eiginleika!  Við erum öll jöfn burt séð frá kynhneigð eða lit, hugsunum eða hegðun ....  Varðandi heittrúað fólk þá held ég að það vanti í það allt grínið, gjörsamlega snautt á köflum ... og Guð sem er húmorist hlítur að hlægja sig dauðan af sumum og .....

[Kristín Katla Árnadóttir, 12.8.2007 kl. 09:42]

Já systir mín og mágur fóru en komst ekki vegna veikinda.

[Svava frá Strandbergi , 12.8.2007 kl. 09:49]

Það hefði verið gaman ef þið hefðuð komist, zordís og Kristín Katla.

[Ásdís Sigurðardóttir, 12.8.2007 kl. 11:01]

Mig langar að deila með ykkur hvernig ég losnaði við fordóma mína í gagn samkynhneigðra. Ég asnaðist í upphafi til að meta þetta út frá kynlífi þeirra en ekki tilfinningum, þannig af því það var öðruvísi en mitt þá fannst mér ég geta dæmt. Sem betur fer tók skynsemi mín yfirhöndina og ég áttaði mig á því að ég var ekkert að pæla í kynlífi gagnkynhneigðra og því ætti ég þá að spá í samk. þá fann ég að eftir stóð ást og hlýja og það er það eina sem skiptir máli, hitt er einkamál og mál hvers og eins, míns,ykkar,Tító og annarra. Kær kveðja til þín.

[Svava frá Strandbergi , 12.8.2007 kl. 12:20]

Já auðvitað Títós líka, Ásdís. Kveðja til baka.

[Katrín Snæhólm Baldursdóttir, 12.8.2007 kl. 23:19]

 Æ er það ekki bara að verða voða gamaldags að dæma aðra svona illa?

Hvar er umburðarlyndi og kærleikur hjá þeim sem fordæma bræaður sína og systur. Ekkert eins hallæerislegt að mínu mati að segja....auðvitað elskum við þau það er bara ástin þeirra sem við fordæmum. Er ekki ástin og kærleikurinn eina lífsaflið sem heilar og lagar???

Gott að þú áttir góðan dag vinkona.

[Svava frá Strandbergi , 12.8.2007 kl. 23:34]

: "Kærleikurinn er langlyndur, hann er góðviljaður. Kærleikurinn öfundar ekki. Kærleikurinn er ekki raupsamur, hreykir sér ekki upp. Hann hegðar sér ekki ósæmilega, leitar ekki síns eigin, hann reiðist ekki, er ekki langrækinn. Hann gleðst ekki yfir óréttvísinni, en samgleðst sannleikanum. Hann breiðir yfir allt, trúir öllu, vonar allt, umber allt.'

Vona að þú eigir líka góða daga bloggvinkona.

[Sigurður Þór Guðjónsson, 13.8.2007 kl. 00:49]

 

[Agný, 13.8.2007 kl. 10:22]

Ég veit þess dæmi að fólk sem hefur verið mjög trúhneigt í lífi sínu og sem hefur komið út úr skápnum seint á ævi sinni hefur verið útskúfað af meðbræðrum sínum og systrum í trúnni. Slíkt hefur jafnvel leitt til hinna hörmulegustu atburða svo sem sjálfsvíga þessa fólks sem fær ekki frið til þess að hlýða kalli hjarta síns.

++++++++++++++++++++++++++++++++++++++

Þetta sem þú segir hér passar nákvæmlega við frænda minn heitinn

[Svava frá Strandbergi , 13.8.2007 kl. 14:25]

Ég samhryggist þér Agný min. Þegar þessi maður dó sem ég tek sem dæmi í pistlinum mínum, tók ég það ákaflega nærri mér, því hann var góður vinur minn og yfirmaður minn í vinnu.

[Jóna Á. Gísladóttir, 14.8.2007 kl. 00:51]

Takk fyrir frábæran pistil Guðný.