Huggun

Þú kemur til mín
ósköp hægt og hljótt
er húmið dökka
sest um sefa minn.
Í hjarta mér
þá helköld ríkir nótt
en heit mín tár
sem falla á fölva kinn.
Þá lýsa mér þín augu
blíð og blá.
Svo björt og hrein
þar skín mér ástin þín.
Sem glæðir aftur
gleymda von og þrá.
Þú göfga litla hjartans,
kisan mín.

 

Tíó mínum hefur versnað undanfarið. Hann hefur legið mikið einn í bólinu sínu og eltir mig ekki lengur um allt. Það er eins og hann sé svo þreyttur og áhugalaus um allt. Hann sem alltaf fylgdi mér hvert fótmál liggur nú bara fyrir og dormar
Hann er líka svo skrýtinn í augunum eins og hann sé alltaf syfjaður og jafnvel þó að hann elti mig stundum fram í eldhús þegar hann heyrir mig opna ísskápinn þá borðar hann samt ekki heldur hangir bara yfir matarskálinni sinni með lokuð augun.
Svo í gærmorgun kastaði hann svo mikið upp og kúgaðist svo mikið. Svo gaf ég honum að borða aftur eftir klukkutíma og þá kastaði hann strax upp aftur, um leið og hann var búinn að borða.
Ég fór með hann upp á dýraspítala og dýralæknirinn gaf honum sterasprautu, B vítamín og sýklalyf og sagði mér að sjá til .
Tító er nú að verða níu ára í nóvember og dýralæknirinn sagði að heilbrigðir balinese kettir yrðu í mesta lagi 10 til 12 ára, en hann hefði náttúrulega aldrei verið heilbrigður með þessi veiku nýru sín og einhvern tíma yrðu allir að deyja, þó hann væri ekki alveg að fara nú á nóinu
Ég er eins og dofin og ég held að það séu  sálræn varnarviðbrögð mín. Ég get vart hugsað til þess að Tító fari frá mér en veit að það er rétt að, að því kemur eins og hjá öllum öðrum, að hann deyr. En þangað til ætla ég að njóta þess tíma sem hann er hjá mér, hann elsku Tító minn.

Athugasemdir

[Kristín Katla Árnadóttir, 16.8.2007 kl. 10:11]

Mikið skil ég þig Guðný mín njóttu tíma með honum eins og þú getur. Tító er svo fallegur en hann er veikur þessi elska.

[Ásdís Sigurðardóttir, 16.8.2007 kl. 10:26]

ELsku Tító, ósköp eigið þið öll erfiða daga núna saman, hann skynjar að hann er að fara geri ég ráð fyrir, dýr eru svo skynsöm. Og nú þarf hann að kveðja ástvini sína og það verður sárt. Ég sendi þér hlýjar kveðjur og knús og orku á Tító sem hefur heillað okkur svo mörg. Fallegt ljóðið þitt.

[Svava frá Strandbergi , 16.8.2007 kl. 10:40]

Takk fyrir góðar kveðjur, skila knúsinu til Títós.

[www.zordis.com, 17.8.2007 kl. 07:23]

Fallegur er hann, greinileg hlýja á milli ykkar.  Njóttu hans og slepptu takinu því hans bíður nýr heimur ....  Sorglegt þegar vinir okkar fara, góðar minningar ilja mér um köttinn minn sem fór ...  Kærleikskveðja til þín G.Svava!

[Svava frá Strandbergi , 17.8.2007 kl. 13:28]

Kær kveðja til þín zordís.

[Ása Hildur Guðjónsdóttir, 17.8.2007 kl. 20:14]

Leiðinlegt að heyra þetta, en allt á sinn vitjunartíma hér á jörð. Njóttu lífsins með honum. Sendi englana mína til Tító.

[gerður rósa gunnarsdóttir, 20.8.2007 kl. 20:17]

Æjá, mér finnst verst að þau þurfi að deyja á undan manni. Samt líklega skárra en að þau standi ein uppi, bjargarlaus. Mér finnst Spotti vera orðinn ægilega gamall eitthvað - og þó er hann ekki nema 6 eða svo - og finnst ægilega furðulegt að hugsa til þess að það komi að því einhvern tímann að hann deyji. Er farin að kvíða fyrir strax. Búin að eiga hann lengur en nokkurn annan kærasta - og sambandsslit ekki á döfinni ;)

En Tító er nú ekki dauður enn, svo það er bara að klappa honum og knúsa sem mest þú mátt. Meira er víst ekki hægt að gera.

[Svava frá Strandbergi , 20.8.2007 kl. 21:29]

Takk Ása mín.

Já Zoa, það er alveg rétt að það er lítið hægt að gera meira en að klappa og knúsa Tító, enda spara ég það svo sannarlega ekki. Ég er líka búin að eiga hann lengur en nokkurn kærasta, fyrir nú utan fyrrverandi eiginmann. Æðislega gaman að heyra frá þér.