Páskadagur

Þá er páskadagur liðinn með öllum sínum heilagleika og súkkulaðiáti.
Ég stútaði sjálf einu stóru páskaeggi í dag. það lá við að ég æti hitt páskaeggið sem ég hafði keypt líka,  en sat á mér.
Það páskaegg ætlaði ég af göfuglyndi mínu þremur litlum ömmubörnum sem ég átti von á í dag með mömmu sinni og pabba.
Krakkagreyin rifust um eggið sitt  þegar þau komu, enda ekki nema von að fá þrjú bara eitt egg til að skipta á milli sín þegar amma þeirra fékk eitt jafnstórt egg bara handa sjálfri sér.
En mamma þeirra vildi að þau fengju eitt egg saman enda var þetta svo sem mikið meira en nóg handa þessum píslum.
Það hefði kannski mátt segja það með góðum rökum að svona stórt páskaegg væri líka mikið meira en nóg handa mér en þegar maður er súkkulaðifíkill hlustar maður ekki á svoleiðis endemis bull.
Ég hegðaði mér allavega mikið  betur í ár en í fyrra, þá tókst mér að innbyrða af óviðjafnanlegri græðgi minni fimm,  segi og skrifa fimm stórum páskaeggjum sem ég ætlaði börnunum en sem enduðu öll einhvern veginn uppi í mér.
Loks þegar ég keypti sjötta páskaeggið stóðst ég freistinguna og blessuð börnin fengu það sem þeim bar.
Þetta var hin ágætasta stund hjá okkur í dag og systkini mín og systurdóttir heiðruðu mig með því að koma lika í heimsókn og fyrir utan páskaeggin voru étnar pönnukökur með rjóma og vínarterta meðan klassíkin hljómaði á geilaspilaranum.
Í kvöld glápti ég á imbakassann með rauðvínsglas í hönd með Tító og Gosa mér við hlið áður en ég tók mig til og bloggaði fyrir nóttina.
Góða nótt öllsömul.

Athugasemdir

[www.zordis.com, 9.4.2007 kl. 08:00]

Notalegur dagur ..... ég er fegin að vera ekki haldin súkkulaðiást nema svona rétt til að smakka!  Gleðilega Páska ........ líst betur á rauðvínsglasið of snemmt að fá sér rauðvínsglas kl.08 á ísl tíma ..............

[Sigurður Þór Guðjónsson, 9.4.2007 kl. 11:18]

Hvernig er með frábæra stund með gvöði á páskum með þessari kristnu þjóð. Er það ekki toppurinn?

[Jenný Anna Baldursdóttir, 9.4.2007 kl. 11:21]

Yndislegur pistill!  Fíknin í súkkulaði getur verið tiltölulega meinlaus ef þú heldur henni svona nokkurn veginn innan eðlilegra marka

[Kristín Katla Árnadóttir, 9.4.2007 kl. 12:55]

Skemtileg stund  hjá ykkur.

[Svava frá Strandbergi , 9.4.2007 kl. 13:04]

Gleðileg páska öllsömul.

Gvöð var náttúrulega líka í kaffi hjá mér Nimbus og átti frábæra stund með okkur öllum.

[Katrín Snæhólm Baldursdóttir, 9.4.2007 kl. 13:39]

Er eitthvað nýtt að frétta frá himnum????

[Svava frá Strandbergi , 9.4.2007 kl. 13:58]

Já auðvitað Katrín. Kristur er upprisinn.

[Þorkell Sigurjónsson, 9.4.2007 kl. 15:51]

Sæl Svava.  Einversstaðar hefi ég lesið, að öll  trúarbrögð séu sprottin af hræðslu og þrekleysi mannkynsins,- hræðsluni við dauðan. Allavega mjög nálægt minni skoðun. Kanske skiljanlegt að trúin og Kristur skuli fá slíka athygli.   

[Svava frá Strandbergi , 9.4.2007 kl. 18:41]

Sæll Keli minn og gleðilega páska til þín og Betu. Já líklega er eitthvað til í þessarri kenningu en ég vona þó að eitthvað meira búi að baki. Neanderdalsmenn vissu t.d. ekkert um Krist en þó viðhöfðu þeir merkilega útfarasiði sem bera vitni um trú á annað líf. Það hefur þá byrjað snemma þetta þrekleysi mannsins.