Rolando Villazón, Placido Domingo og La traviata

Ég sat sem heilluð yfir heimildamyndinni í sjónvarpinu í kvöld um mexíkóska tenórsöngvarann, Rolando Villazón.
Hann söng m. a. aríur úr 'Rigoletto' og 'Carmen' og svo uppáhaldinu mínu 'La traviata', þar sem hann söng  og lék framúrskarandi vel,  nokkra valda parta úr hlutverki ´Alfredos' á móti 'Violettu Valery'.

Hann syngur eins og engill og leikur af miklum ástríðuhita, eins og hetjutenórar eiga að gera,  slagar meira að segja hátt upp í Placido Domingo átrúnaðargoðið sitt og  líka mitt auðvitað.

Mér fannst Placido samt myndarlegri á velli þegar hann var upp á sitt besta, heldur en Rolando, þó Rolando hafi líka þennan suðræna sjarma eins og Placido.

Ég fór nú ekki sjaldnar en tíu sinnum á 'La travita',  fyrir rúlmlega 20 árum síðan. Þá var Placido í hlutverki Alfredos en Theresa Stratas söng og lék Violettu Valery. Ég vílaði meira að segja ekki fyrir mér að ganga alla leið ofan úr efra - Breiðholti um hávetur í öll þessi tíu skipti, niðrí Sambíóin í Mjódd og klofaði stundum snjóinn upp fyrir miðja kálfa. Alltaf var ég útgrátin að hverri sýningu lokinni, samt var ég búin að sjá 'La traviata', tvisvar áður, í Óperunni með Carðari Cortes og Ólöfu Kolbrúnu Harðardóttur og grét þá líka auðvitað eins og múkki.

Óperur er mitt helsta yndi að hlusta á og horfa. Sögusvið óperanna er líka oft svo dramatískt  og eða rómantískt, þær spila á allan tilfinningaskalann. Að horfa á óperu finnst mér vera svipuð upplifun eins og maður sé svo ástfangin að maður sé beinlínis á bleiku skýi eða í sjöunda himni.

Semsagt, ég elska óperur og ég ætla að horfa á annað óperu- myndbandið sem sonur minn keypti handa mér á Ítalíu fyrir fjölda ára,  við  fyrsta  tækifæri. Ég hef ekki tölu á hve oft ég hef horft á þetta myndband, sem er auðvitað með 'La traviata' og Placido Domingo og Theresu Stratas í aðalhlutverkunum. Ég ætla að horfa á óperuna með rauðvínsglas í annarri hendi og snýtuklút í hinni. Og ég hlakka óskaplega til.

Athugasemdir

[Jóna Á. Gísladóttir, 21.6.2007 kl. 01:21]

ætla að segja þér leyndarmál... hef aldrei farið á óperu. Ætla að kynna mér málið við fyrsta tækifæri.

[Kristín Katla Árnadóttir, 21.6.2007 kl. 10:20]

Ég hef farið á óperu það var skemmtilegt.

[Katrín Snæhólm Baldursdóttir, 21.6.2007 kl. 11:59]

Ég elska tónlist af öllum toga og þá sérstakelga klassík og sumar óperur en hef aldrei séð eina. Er það ekki skrítið???

Eins og að elska hafið en hafa aldrei vaðið...

[Ásdís Sigurðardóttir, 21.6.2007 kl. 12:48]

Missti af þessu en trúi þér alveg. Hef ekki séð óperur nema í TV en þær eru oft æðislegar.

[Sigurður Þór Guðjónsson, 21.6.2007 kl. 15:27]

Þú hlytur þá að gráta alveg gríðarlega á Rigolettó þegar hann drepur dóttur sína í misgripum í lokin og ég tala nú ekki um á Toscu þar sem mig minnir að allir drepist. Ég man ekki hvað stórstónskáld það varð að skilja eina óperuna sína ófullgerða af því að hann var óvart í sköpunargleði sinni búinn að drepa allar persónurnar þegar sagan var bara hálfnuð.   

[Svava frá Strandbergi , 21.6.2007 kl. 16:21]

Já stelpur, þið verðið að fara í óperuna það hafa bara verið svo framúrskarandi leiðinlegar óperur í Íslensku óperunni undanfarið að þið verðið að fara til útlanda til að sjá alvöru óperu. 

Siggi, ég nota ekki snýtuklút þegar ég horfi á Rigoletto og Toscu, já og líka Aidu heldur borðklút. 

[gerður rósa gunnarsdóttir, 21.6.2007 kl. 21:28]

Ég fór einmitt svipað oft á First Blood ... sko fyrstu Rambó-myndina ;)
Ég reyni ekki einu sinni að fara á óperur - ég grenja með ekkasogum bara af því að horfa á ballettsýningu! BALLETT!! Ég fíla ekki einusinni ballett!

[Svava frá Strandbergi , 21.6.2007 kl. 23:45]

Hvers vegna grenjarðu þá með ekkasogum þegar þú horfir á ballet þegar þú fílar ekki einu sinni ballett Gerður Rósa? Grenjarðu þá úr leiðindum?
En þú ættir að horfa á fílana dansa ballett í einni í Disney teiknimyndinni þá myndirðu garga af hlátri, hvað heitir myndin nú aftur? Hún er líka með Mikka mús í hlutverki lærssveins galdrameistarans og tónverkið  Lærisveinn Galdrameistarans er spilað í þeim parti myndarinnar sem er öll byggð upp kringum klassíska músík. 

[Sigurður Þór Guðjónsson, 21.6.2007 kl. 23:52]

Myndin heitir Fantasía. 

[Svava frá Strandbergi , 22.6.2007 kl. 00:09]

Já einmitt, ég var með það einhvers staðar í minninu í hausnum á mér en gat ómögulega náð í það. Takk.

[gerður rósa gunnarsdóttir, 23.6.2007 kl. 22:50]

Æ bara svona sýningar, þið skiljið (??) ... Allt of áhrifamikið eitthvað.

Panta þessa FANTA-síu með næstu ferð.